👌كيفية إستلام الشقق وإيه الملاحظات اللي هنخلي بالنا منها في التشطيب الخاص بالشقة.
✍️هتاخد معاك ورقة وقلم وتبدأ تكتب ملاحظاتك اللي مش راضي عنها في شقتك.
👌ومتمضيش على محضر الإستلام من غير ما تتنفذ.
✍️هنبدأ نتكلم عن البنود اللي حضرتك هتستلمها من المهندس المسؤل عن التسليم
_________
✍️النجارة
__________
👈 هتتأكد كويس إن كل الأبواب سليمة ومفيهاش كسر في أي مكان في الباب أو الشباك.
👈 تأكد من عدم وجود فراغات بين بار الباب وبين الحيط ولو لقيت حاجة زي كدة أطلب ملئ الفراغات دي سواء بمعجون أو جبس حسب الحاجة.
👈 جرب بنفسك كل الكوالين وجرب كل المفاتيح وتأكد من إن كله شغال تماما ولو فيه كالون بيعلق او مبيفتحش ويقفل أطلب تغييره.
👈 ومتنساش تاخد معاك قلب كالون باب شقة بمفاتيح كمبيوتر.
👈 جرب كل الأوكر في كل الأبواب من الجانبين جوة وبرة الباب وتأكد من إن الأوكر سليمة وإن اللسان بيدخل ويخرج مع الضغط على الأوكر.
👈 تأكد من عدم احتكاك الأبواب بالسيراميك من الأسفل.
👈 تأكد من الشيش بيفتح ويقفل كويس ومش بيحتك بالحلق من تحت ويجرح في الحلق.
👈 تأكد من سلامة الزجاج الخاص بأبواب الحمام والمطبخ وعدم وجود كسر فيه أو إن الزجاج فيه فراغات في الفتحة الخاصة بيه من فوق أو تحت.
👈 تأكد من وجود بار في الحمام والمطبخ من الداخل لو الحلق مسلم على السيراميك.
_________
✍️السباكة
________
👈 تأكد من سلامة كل الخلاطات جربها بنفسك افتح واقفل البارد والسخن وتأكد من ان الخلاط شغال كويس.
👈 تأكد من ثبات الخلاط في مكانه وعدم تحريكه أثناء الفتح والغلق.
👈 تأكد من ثبات أدوات الصحي "القاعدة والحوض والبانيو "في مكانها تماما وعدم التحريك من مكانهم.
👈 تأكد من عدم وجود تسريب في جميع مواسير السباكة والصرف وأسفل الحوض والقاعدة والبانيو وافتح المية فيهم وشوف.
👈 حوض المطبخ كذلك تأكد من سلامته وثباته وعدم التسريب أسفله.
👈 تأكد من تشغيل الدش وسلامته أيض
_____________
✍️الكهرباء
_____________
👈هتآخد معاك شاحن أو لمبة بفيشة وتجرب كل الفيش أوالبرايز وتأكد من إن كله شغال تمام.
👈 تأكد من تشغيل كل المفاتيح واللمبات.
👈 تأكد من وجود غطاء لوحة المفاتيح الرئيسية.
👈 إفتح وإقفل مفاتيح اللوحة وتأكد من تشغيل وإطفاء الإضاءة أثناء الفتح والغلق.
👈 فيه كشاف في البلكونة جربه متنساش.
👈 تأكد من وجود سلامة كل الوشوش وعدم وجود تكسير حوالين الوش ولو فيه تكسير أطلب قفله بمعجون أو جبس حسب الحاجة.
👈 عندك لقمة دش في الصالة برة تأكد من وجودها.
___________
✍️الألوميتال
____________
👈 تأكد من عدم وجود شروخ او كسور في الزجاج.
👈 تأكد من الفتح والغلق بسهولة.
👈 الإكسسوار "الأوكر" تأكد من سلامته وثباته في قطاع الالومنيوم.
👈 تأكد من فتح وغلق دلفة السلك في المطبخ بسهولة وعدم صعوبة فتحها وغلقها
👈 باب البلكونة الصغيرة المفصلي تأكد من إغلاق لوح البولي كربونيت أو الزجاج في الاربع اتجاهات وعدم وجود فراغ في أي إتجاه.
___________
✍️السيراميك
____________
👈 تأكد من سقية السيراميك كويس جدا وعدم وجود فراغات بين البلاطات من غير تقفيل بالأسمنت الأبيض.
👈 سلامة الأرضية وعدم وجود بلاطات مكسورة سواء أرضية أو حوائط.
👈 عدم تطبيل البلاطات.
👈 ثبات السيراميك وعدم تحركه.
👈 توحيد البلاطات في كل الشقة لو لقيت بلاطات مختلفة مثلا في الارضية عن السائد في كل الشقة اطلب توحيد كل البلاطات لأنها مش سلطة.
👈 تأكد من وصول السيراميك للسقف في الحمام والمطبخ.
______________
✍️النقاشة
_______________
👈 تأكد من دهان الشقة بالكامل لأن أحيانا بندخل مشاريع بيبقي فيها تفويت في دهان بعض الأجزاء في الشقق.
👈 تأكد من ملئ الفراغات بين الأبواب والحيط.
👈 تأكد عدم وجود فرقعة او عدم ثبات الدهان على الحيط.
👈 الشكل العام للدهان يكون شكله كويس في العين وعدم وجود وسخ أو علامات على الحيط بلون مختلف أو شيء من هذا القبيل.
👈 تأكد من دهان الأبواب كلها وخصوصا ضهر باب الحمام والمطبخ أحيانا بيفوتوه.
👈 دهان الكريتال الخاص بالبلكونة تأكد من دهانه بلون كريتال واجهة العمارة.
